Ny 18 desambra teo no nisy lahatsoratra navoakan’ny filazam-baovao Africa Intelligence fa tonga ao Nosy Be, ary hipetraka ao hatraminy faha-25 desambra ny mpampiasa vola émirati (avy any Emirats Arabes Unis) mpanamboatra toerana fizahan-tany ho an’ny manan-katao.
Voalaza tao amin’ny lahatsoratra fa mandritra ity fandalovany ity no ho faranany miaraka amin’ny Filoham-pirenena Andry Rajoelina ny fifampiraharahana momba ny Nosy Mitsio.
Noho izany, dia nandefa taratasy ho an’ny Lehiben’ny orinasa Emaar Properties (tamin’ny teny anglisy, izay nadika toy izao amin’ny teny malagasy) ny fikambanana ao amin’ny firaisamonim-pirenena maromaro manasonia.
Mitovy amin’izao koa ny taratasy nalefa tamin’ny Filoham-pirenena Andry Rajoelina fa ny andalana roa voalohany no nisiana fanovàna nampifanarahana tamin’ny olona iantefàna.
Ho an’ Andriamatoa MOHAMED ALABBAR,
Filohan’ny orinasa EMAAR PROPERTIES
Rehefa nahafantatra tamin’ny gazety fa ao Nosy Be ianao amin’izao fotoana izao, dia miarahaba anao izahay fikambanana ao amin’ny fiarahamonim-pirenena izay nanao sonia ity taratasy ity.
Nampahafantatra anay ihany koa ny gazety fa mandritra ity fandalovanao ity, mikasa ny hihaona amin’ny Filohan’ny Repoblika Malagasy Andry Rajoelina ianao mba hamarana fifanarahana momba ny nosy Mitsio .
Ny tanjon’ny hafatray dia ny fanamafisana fa ao Nosy Mitsio, ilay nosy lehibe indrindra ao amin’ity vondronosy ity, dia misy olona maherin’ny arivo mipetraka, lehilahy, vehivavy sy ankizy, olombelona tahaka anao sy tahaka anay, izay tsy maintsy hajaina ny zon’olombelony fototra.
Araka ny fahalalanay azy, ny vondrom-piarahamonina ao dia tsy mbola nampahafantarina mihitsy tamin’ny fomba ofisialy sy mazava momba ny tetikasa « toerana fizahantany » kasaina hatao ao amin’ny nosiny, izay noresahan’ny manampahefam-panjakana tamin’ny haino aman-jery ary indrindra taminareo mpampiasa vola.
Tsy mbola nikarakara fihaonana tamin’ny fokonolona ao amin’ity nosy ity ireo manampahefana ireo, na dia manan-danja lehibe eo amin’ny fomba amam-panao malagasy aza ny fifampidinihina sy fakàna hevitra, ary ny foto-kevitry ny lalàna iraisam-pirenena dia mitaky ny fampahafantarana mialoha sy ny faneken’ireo vondrom-piarahamonina voakasiky ny tetikasa izay fampiasam-bola kasaina atao.
Mety tsy ho sahy mampahafantatra ny vondrom-piaraha-monina ao Nosy Mitsio ireo tompon’andraiki–panjakana samihafa satria fantatr’izy ireo fa mety handà tanteraka ny fakàna ny taniny sy ny fikirakiràna ny nosiny toy ny entam-barotra tsy misy hasiny ny fokonolona.
Fanampin’izany, ny lalànan’ny Repoblika Malagasy dia mandrara ny fivarotana nosy sy ny fampanofàna ny moron-dranomasina anatin’ny 25 metatra miala avy eo amin’ny toerana tratry ny ranomasina rehefa miakatra izy (antsoina hoe bande littorale de 25m) eran’ny firenena.
Manohana mafy ny mponin’i Nosy Mitsio izahay.
– amin’ny fiarovana ny tany izay nomen’ny razany ho lovany, sy tena loharanon’ny foto-pivelomany,
– ary amin’ny fiarovana ny kolontsainy sy ny dingana efa vitany eo amin’ny diany mankany amin’ny fampandrosoana.
Matoky ny fahendrenao amin’ny fijerena ny maha-olona izahay, Andriamatoa Filohan’ny orinasa, ary manao veloma anao am-panajàna
20 desambra 2024
ACTIONS CITOYENNES MADAGASCAR
As-Aqua Madagascar
ASDFEM TOLIARA
ASSOCIATION GASY MANDROSO- AGM
Association Liberty 32
Association MMST
Association TSARAJORO ANKARANA
Coalition Paysanne de Madagascar – CPM
Collectif des Jeunes Engagés Atsimo-Andrefana (COJEAA)
Collectif pour la défense des terres malgaches – TANY
Femmes en Actions Rurale de Madagascar – FARM
FIANTSO MADAGASCAR
Fikambanan’ny LEHILAHY MANDRAY ANDRAIKITRA Amoron’i Mania
Fikambanana RVF-MFB
FOCUS DEVELOPMENT ASSOCIATION (FDA)
FTMF
GROUPE MANOVA IMERINTSIATOSIKA
Jeunesse et Citoyenneté
KMF CNOE – Fanabeazana Olompirenena
KOMITY NY DINA BE SAINTE MARIE
Monique RAKOTOANOSY
ONG EFA
ONG FAHAZAVANA
ONG SOS AUX JEUNES DE MADAGASCAR
ONG Tsinjo Aina Mahajanga
Organisation de la société civile sur les Industries Extractives (OSCIE)
OSC MANDRESY Diana
OSC MANDRESY Nosy Be
PFED Nosy Be
Plateforme Nationale des Organisations de la Société Civile (PFNOSCM)
Plateforme Solidarité des Intervenants sur le Foncier (SIF)
SE.MPI.ZOF
Sendikà TOLON’NY MPIASA (T.M)
Soa Gny Mivoatse – Fifata Ihorombe
Tambazotra Nasionaly Mpiantsehatra amin’ny Fifidianana (TNMF)
Tantsaha Mivoatsy
Transparency International Initiative Madagascar (TI-MG)
USAM – RANDRANA SENDIKALY
VOHIFIRAISANA Analamanga